（二十）

果晚大战过後，因为第二日（礼拜日）朝早约左屋企人饮茶，所以我起身同Kenny say个bye就直接走左。

喺搭地铁出番去期间，我数数手指，发现距离Kenny去读书只系剩番十日左右，唔知我会唔会喺佢临走前再见多佢一次呢？

过左两日，Kenny p我，问我礼拜六得唔得闲去佢farewell party。其实我预左果个礼拜六日要番去OT，而且同佢啲朋友又唔熟，怕去到会闷，但同时又怕今次唔去就再见唔到佢，天人交战咗之後，我决定问吓佢仲有无其他日子。

我﹕果日我唔firm呀！要加班。你个大忙人！临走前仲有无其他日子得闲食个饭呀？

Kenny﹕我礼拜四走，礼拜三晚要陪屋企人食饭，一系我过两日覆你啦。

我﹕好呀！

果两日我真系好忐忑，心谂如果佢话佢再无时间，咁我系咪就无机会再见佢？我有谂过不如我直接同公司讲果两日唔OT，然後同Kenny讲我得闲，但果两日OT全世界都番我唔番好似好怪咁；同时我又谂，如果Kenny肯为我逼出一啲时间食餐饭，系咪代表我喺佢心入面多少都占一定地位呢？

到礼拜四，终於收到Kenny的p回覆。

Kenny﹕光哥不如我临走之前约打番场波罗？

我﹕好呀…但系我呢个weekend两日都要OT呀！

Kenny﹕哦…咁…算罗。

我﹕er…咁你临走前边日得呀？最多我请半日假陪你打波罗！

Kenny﹕好呀好呀！光哥你真系好好人。礼拜二你得唔得呀？

我﹕应该无问题。

後来我忽然醒起同Kenny识左咁耐都未同佢去睇过戏，决定问佢要唔要睇戏打波直落。

我﹕喂，果日我请下昼假，两三点太热唔想打波住，去睇场戏先好唔好呀？

Kenny﹕好呀！咁啱先我都有套戏想睇！

我﹕你想睇边套呀？

Kenny﹕我想睇迷你兵团！

我﹕哦你渣主意啦。

Kenny﹕好耶～～我之前问我条女睇唔睇佢话幼稚喎，真系好光哥你肯陪我。

我﹕哈哈幼稚咪啱你罗！

Kenny﹕咁我买飞同book场。

眨下眼就去到礼拜二，果朝我快快手做晒手上啲工作，然後准时放工然後去戏院同Kenny会合。

因为系暑假，加上我地睇套动画片，所以闲日下昼个院都好多小朋友。其实我一路睇一路打喊露，因为套戏真系几幼稚下，果三只黄色怪做啲嘢好鬼无聊，剧情又平淡，但唔明点解全场好多人都笑得好开心，包括Kenny…

本章尚未完结,请点击下一页继续阅读---->>>