我行。7-11买返嚟嘅酒精好似倒水咁灌落我嘅胃入面，令个肚有一阵刺激嘅暖意。

「记唔记得呢，我同你以前会喺西营盘行落中环食胜香园，或者行到去苏豪啲Cafe度，我哋仲话搵日行落铜锣湾。」

「记得呀，个时我哋真系太得闲。」

「我同Vi呢，都好中意咁样系条街度行。」

我同Daniel沿住电车路向前行，勾起一串串互相纠缠嘅往事。分手之後头一个月，我连行过呢几个充满回忆嘅街口都唔敢，因为我知道自己一定唔会够坚强忍得住。我同Daniel行过一间间一早收咗铺嘅商户，铁色嘅大闸比平时更显冰冷，新一日嘅报纸喺行人路上面一地都系，间唔中路过嘅途人，见到我哋两个好静嘅男仔并肩而行。

「我呢?系咪好cheap啊？我企到去佢面前，佢都唔理我，但我都唔肯走。」

头先Vi毫无反应嘅静谧，喺我心入面仍然回荡住震耳欲聋嘅回音。正当我以为同佢已经过咗咁耐，震荡已经完结之後，突然发生毫无徵兆嘅余震，令难得先至重建好嘅心房再次倒下。我先至好唔甘心咁发现，原来我仲未放得低，原来我，咁不堪一击。

「而且呢，仲要唔只系佢。」

成晚我同成个场都好似格格不入咁，去到边都好似阻住哂。有好多次，我都想证明俾佢睇，无咗佢，无都可以过得好好，但原来，一直都系我自己嘅错觉。我只不过系佢过去曾经遗弃嘅一件玩具，好下贱咁乞求佢嘅怜悯。

我嘅抽泣声喺黑夜之中特别显着，我原本都无谂过会喺Daniel面前喊成咁，不过，我忍唔到嘅情绪越过咗临界点之後，我先发现一路承载住嘅情感比我想像中更多。Daniel嘅手喺我背脊度来回拍咗几吓，

「你唔好咁hard on 你自己啦。」

我哋喺和昌大押前面转咗个弯，皇后大道东更静更少人，连街灯都好似更暗。月落之後嘅天空竟然可以见到星星，喺闹市之中都尙算罕见。就咁无声无息咁，我同Daniel经过咗太古广场，行到中银下面。可能喺被酒精淤塞嘅大脑令视线不断摇晃，天桥连住圆型嘅楼梯不断旋转，向下，好似一个唔会停止嘅漩涡。

我望住路牌，停低咗脚歩。我同Daniel讲，亦都系同自己讲，

「过咗呢条街，过咗呢条街我就唔会再为佢而喊。」

我行去楼梯下面，就咁坐低，我知道间歇性停止嘅泪水仲未见底，我饮埋手入面酒樽最後嘅几啖，抽出耳机，然後就?一首歌，单曲循环，前奏一响起，我已经眼角湿咗一半。

我强迫自己回想起过去一切同佢嘅回忆，所以因为佢而喊过嘅事，佢一开始对我嘅依依不舍，到最後嘅若即若离，我会好好记得呢个人。

未想过放弃但被人放弃，变成前男友的你

但系我唔想再因为佢而流眼泪，我唔想再下一次自己一个嘅时候，突然脑海中掠过一丝伤感，然後谂起佢。

就似所有过去男友，为了抛弃我才邂逅

啜泣演变成嘅抽泣，变成呼吸困难嘅哭泣。Daniel只手搭着我，我块面埋喺佢膊头上面，眼泪沾湿佢件恤衫。我指尖仲剩余少少尼古丁嘅味道，提起我每次等佢食烟嘅时候嘅感觉。佢每次食完烟之後同我kiss嘅笑容，嗰阵焦黄嘅味道，承载住我好耐好耐之前嘅幸福。我双手用力按住眉骨，手掌喺鼻尖中间用力按压，直到泪水停低。

不松手都给收走，有谁能说我未够

我望住眼神有啲担忧嘅Daniel，佢口入面酒精嘅甜味传入我嘅鼻腔，遮掩咗本来就淡然嘅烟味。我向前一倾，喺嘴唇上面留低咗我嘅唇纹。

————————————

有啲人，好似烟瘾一样，介唔甩。

我唔系一个烟民，但每次空气入面散发出尼古丁嘅味道，

我都会唔小心谂起你。

有一次搭车，隔离个啊伯一阵烟味，

但唔知点解佢起身离开座位之後，我眼角竟然湿咗少少。

我从来都唔食烟，亦唔会食烟，

但唔知点解，有阵烟瘾。

一次过出两part因为系同一件事。

我真系好记得由铜锣湾喊住行返西环个晚。

下一章会开心啲，希望可以快啲写得哂。

本章已阅读完毕(请点击下一章继续阅读!)