一条窄巷入面，行前两步，停低，然後好似一个嗰啲导游咁挥一挥只手。

「欢迎各位同学嚟到牙医学院，呢度系，Kong U 唯一真男神，Nick Sung嘅寝宫」

「又特登行过嚟撞Nick Sung啊？」

「系咁又点啊」

「你都真系?好神心喎，俾你撞到又点呢？」

「无?，离远咁望吓佢罗」

呢个人，为咗仔仔可以去到几尽。但系今日经过牙医学院嘅我，都不其然咁环顾一吓四围，唔知，会唔会见到高大嘅身影喺附近经过。

第一街、第二街、第三街、高街，越行越上嘅我都开始有啲气喘。高街鬼屋嘅花岗岩墙身对望住佐治五世纪念公园嘅石梯，喺入夜之後似乎更加灵异。IFC喺路嘅尽头出现，白色嘅灯光喺充满雾气嘅天空随意咁散开，好似灯塔咁引诱唔知情嘅雀鸟撞埋去。

「你觉唔觉得呢，IFC好似一碌尻？」我当时真系完全唔知点覆佢，但自从Benjie咁讲之後，我又好似开始睇到少少尻嘅形状。

「咩人咪睇到啲咩罗，你望住棵树都觉得似尻?啦」

「喂，唔系讲笑，嗱，你望下，」佢指住前面嘅一棵树，「嗰个就龟头，呢度呢，就系啲筋，」

「好牵强喎」

「俾啲想像力啦」

我突然发现自己停低脚步，喺度望住一棵淹没咗橙色街灯灯嘅嘅树。

唔想返屋企嘅人，兜过西环又行返去上环嘅方向。星期六嘅夜晚，好似都系催谷人向酒吧前往。我有啲好奇，究竟自己几时培养咗呢个一得闲就饮酒嘅习性。

手机通讯录打开喺上次搵嘅人嘅页面。我知道搵佢佢一定得闲，但我今晚唔想咁快面对复杂嘅心情住。所以我又转到另一个人嘅电话，

「喂？」

「喂，想唔想饮嘢？」

「好少可喎，突然搵我」

「倾吓计啊嘛，上环方唔方便？」

「可以，十五分钟之後喺我楼下等？」

「ok」

我应该有年几两年无嚟过上环嘅基吧。上一次喺唔知边年倒数，由中环一直扫过嚟苏杭街，就喺嘅条彩虹色嘅楼梯，望住Benjie呕到九彩。

以前星期六晚嘅人多到载满成间吧，逼到马路上面都系一个个揸住杯嘢饮嘅单身男人，但而家好似并无呢个现象再出现。

Chris望住我，等紧我同佢讲点解今晚咁有兴致叫佢出嚟陪我。

「今日我又撞到Hugo」我单刀直入，并无在意Chris同佢分手只不过都一个月左右。

「系咩？佢点啊？」Chris好似无咩大不了咁，饮咗一啖佢手中嗰一pint啤酒。

「都系咁啦」

「good for him.」

「其实你哋点解分手嘅？」

「I dont know, he broke up with me over text.」佢又饮多一啖。「淡咗挂。」

「我问一个问题，你唔锺意答可以唔答。」

「唔」

「你觉得，佢系咪因为锺意我先同你分手？」我知自己踩紧一千万个地雷，随便重心放错都会引发连环爆炸。而我其实都唔知点解我觉得有必要要搵到呢个问题嘅答案。

我唔敢深呼吸，静心咁等待佢突然嘅爆破。

「我觉得，」出其地冷静嘅佢，又饮多咗一啖啤酒，制造咗好多空隙。「就算唔系你，迟早佢都会锺意其他人。」

我用咗三秒去理解，呢个究竟系肯定定否定嘅答案。

「Sorry」我下意识地道歉，我都唔知系为咗边件事。

「it’s not your fault.」

我同佢好一致咁拎起啤酒，望住门口饮咗一啖小麦嘅苦涩，望住入面嘅人出出入入。

「问多你一个问题，你同Benjie最近点啊？」

「咩点啊？」

「你哋?」我犹豫咗半秒，等紧佢自己理解，但佢仍然一头雾水咁望住我。「我以为你知道佢锺意你添」

「佢?我?都唔系唔知嘅」我望住佢，佢露出一副好少有嘅尴尬。「我?都唔知点搞」

「你唔会同佢一齐？」

「我真系无谂过，都识咗咁耐。而且?我啱啱先散咗」

「都系嘅，享受吓单身罗?食吓仔都几开心啊」

周围嘅人讲紧唔同嘅嘢，企喺我隔离嘅人群大声咁笑，我突然谂起Benjie把吵杂嘅声，原来无咗佢，都真系会静咗好多。我同Chris嘅话题都慢慢减轻重量，几pint啤酒好快就饮哂。

我返到屋企，凌晨两点半，好安静咁唔想嘈醒任何人。我返返房，望住痴喺我枱头嘅学生相，Benjie就咁望住我，好似等紧我讲咩咁。

你知唔知啊，我终於知自己等紧咩啦。

原来我一路等紧自己发现，以前嘅嘢，等唔到?啦，唔好等啦。

系啊，我唔等啦。

——————

如果你睇到好乱

爱情就系令人好乱嘅坏东西

本章已阅读完毕(请点击下一章继续阅读!)